0
0
Volejbollisti me famë globale dhe me origjinë shqiptare, Donald Suxho qëndroi për vizitë të dielën në Kosovë, ku pati mundësinë të takohet me presidentin e Federatës së Volejbollit të Kosovës, Bahri Gjinovci, sekretarin e përgjithshëm, Valon Nikqi dhe selektorin e Kombëtares U19, femrat, Lorik Ilazi.
Suxho u njoftua së afërmi me aktivitetet dhe punën e FVK-së, derisa u shpreh i kënaqur me punën që po bëhet në zhvillimin e volejbollit kosovar.
Ndër të tjerash, Suxho u shpreh i gatshëm të vazhdojë të ndihmojë volejbollin kosovar, siç ka bërë edhe në të kaluarën, derisa shkëmbeu biseda dhe diskutime rreth volejbollit me presidentin Gjinovci dhe sekretarin Nikqi.
Krerët e FVK-së u shprehën të kënaqur me përfaqësimin dinjitoz që ai i ka bërë volejbollit shqiptar përgjatë karrierës së suksesshme të tij.
Në fund, presidenti Gjinovci i dhuroi fanellën e Kosovës, të cilën Suxho e pranoi me kënaqësi.
Kujtojmë se Suxho preku majat e volejbollit botëror, duke marrë pjesë si kapiten i SHBA-ve në Kampionatin Botëror dhe Lojërat Olimpike.
